福娘童話集 > 日本昔話 > １月

天狗个能力比賽

・日本語　・客家語　・日本語＆客家語

客家語 : 鄧文政(ten33 vun55 zhin11)

　頭擺頭擺，中國有一條安到chiraeju个天狗。
　這條天狗在天西恁遠个中國飛過大海，來到日本。
　然後，摎日本个天狗講：
「在𠊎中國盡多高僧，毋過，毋自由个人無半儕。
　聽講日本也有修行得道个高僧，𠊎特別過來。
　想尋一個敢同𠊎比能力个人，仰般？」
　中國个天狗像人盡偉大樣在該講。
　日本天狗看著該種態度盡火著，但係無表現出來，顛倒盡有禮貌講：
「恁遠䟓䟓來這辛苦咧。
　實際上日本有當多做得講係名僧、高僧个和尚，能力比該兜天狗較強。
　所以正會想愛對這大條擘擘个中國天狗，堵講：
「毋係，這個國家分人稱讚大个和尚，乜無麽个了不起。
　𠊎兜想愛教訓佢乜做得。
　毋過，䟓工在恁遠个國家來，尋二、三个適當个和尚來教訓也好。
　請！摎𠊎共下來去。」
　講煞，日本天狗就渡等中國天狗去到比叡山。

　該係京都透比叡山延曆寺个山路。
「𠊎兜摎佢盡熟識，最好愛在樹林草竇肚囥等，
　你變做老法師來教訓過路人。」
　日本天狗講忒煞煞走去囥。
　並偷看中國天狗。
　過後，中國天狗變做盡派頭个老法師。
　過無幾久，在山頂下來一個安著余慶律師个和尚坐轎順等山路行來，一大群弟子跈等愛去京都。
　余慶律師等一大群人慢慢行兼來了。
　無想到，向中國天狗該方向看去，嗄毋見忒，
　余慶律師該兜人像形麽个事又無樣，恬恬行等過。
（還奇怪呢！行去那？）
　緊恁樣想緊尋中國天狗時節，看到南片山窩仰會有一個翹出來个屎胐，還吃吃惇。
　日本天狗行兼去，
　問佢講：「仰會园在這位？」
　中國天狗用該緊惇个聲音、
　問講：「頭下經過个人係麽儕？」
「係余慶律師。你仰會無教訓佢兜呢？」
　日本天狗問過後，中國天狗緊搔頭那講：
「毋係恁樣、該隻事情，
　看阿著黏時斯知這個做得教訓麽？
　因為企个方向關係，仰般形又看毋到對手个樣仔，轎个頂背一片火海，
　𠊎想一定毋會贏佢正會囥起來。」
　日本天狗聽著心肝肚偷笑。
（總講中國天狗無麼个了不起，再過撩佢。）
　神投投仔講：
「在恁遠个中國䟓䟓來到這位，連這種人斯無才調教訓，這擺定著愛教訓佢。」
「係哦、你講著有道理，好！看等，這擺定著教訓分你看，哼！哼！！」
　中國天狗鼓起勇氣，又變做老法師。
　過無幾久在山頂下來一個和尚。
　佢係深禪權僧正和尚，轎頭前有一個開路後生細倈仔、擎等棍仔行在頭前。
　日本天狗囥在草竇肚，偷偷看。
中國天狗在轎行兼个時節，像扡婆抓雞子遊戲肚个雞嫲樣兩手伸長長愛攔路，等佢看著開路个後生細倈仔，得人驚个面又舞動大龍棍个時節，嗄揇等頭那落荒仔（lag5 fang11 er55）瀉到窩壢底去。
「仰般、還係走去囥係無？」
　日本天狗在草竇肚講：
　過後中國天狗像人盡艱苦樣，氣凹凹講：
「毋好講个無字个，轎頂个人毋使講，連該个開路該個乜做毋得兼身。」
「恁得人驚个對手係麼？」
「無論仰般，𠊎个翼个速度做得從遠方个中國飛到日本來，毋過無辦法比後生細倈仔脚步較遽。
　若係分佢捉著，頭那殼會分佢該大鐵棍打爛忒。」
「有影無？下二擺較加油兜，總講來到日本咧，一息仔做得歕雞胲个話頭都無俟轉去盡無面子，係麽？」
　日本天狗講煞，遽遽囥轉草竇肚，
　中國天狗無法度，高不將等下一個和尚來。
　等一下仔，看到一大堆人在山下行上山頂來。
　頭前係一個著紅色袈裟个和尚，後背係後生和尚捧等盡派頭个箱仔跟等。
　後背坐轎个人乜來到山頂。
　轎个左右兩片，大約有二十個童子掌等。
　這位坐轎个人係比叡山延曆寺个慈惠大僧正，一等偉大个和尚。
　日本天狗在草竇肚偷偷看一下附近。
　毋過尋毋到中國天狗變个老法師。
「敢係又逃走咧？也係囥在那位尋機會？」
　童子之中有一儕大嫲牯聲講：
「這隻地方园有妨害佛法个東西，愛尋較詳細兜仔看看。」
　過後該兜精神當好个童子，手牽手拿等棍仔，分做二隊在路个二片行。
　分佢兜尋到會無結煞，日本天狗再過弄較裡肚去，毋敢敨大氣。
　聽得著窩壢對面童子大聲噦。
「你看！這位有一个妖怪，遽遽促到來！」
「麼个、麽儕在該？」
「有一個老翹翹个法師囥在這，你看厥个目珠，普通个目珠毋係恁樣。」
（無結煞，中國天狗還係分人捉著。）
　日本天狗又乜驚到會死，該頭那揬到地泥，目金金在該跪拜。
　無幾久脚步聲緊行緊遠。
　日本天狗在草竇行出來，向四圍緊看。
　看到有十个童子定定，包圍中國天狗變个老法師。
「哪位來个法師，報出名來，有麽个目的，會囥在這位！」
　其中一個童子大嫲聲講：
　中國天狗驚到身体跔細，氣扯氣急應講：
「𠊎係中國來个天狗。」
「麼个啊，中國个天狗？來這做麽个？！」
「聽講有高僧會經過這，𠊎在這等佢。
　最先來到這個个和尚，緊行緊唸咒文，所以腰仔頂背一片火海。
　一下無細義偎兼佢會分佢燒死。所以落屎荒瀉走去。
　第二個來个和尚毋單淨唸不動明王个咒文，還有高大个童子擎等鉄棍仔在脣頭掌等。
　因為這，再過遽遽逃走。
　這擺這個和尚無唸該得人驚个咒文，斯在心肝肚頌經定定。
　話到毋會得人驚，所以正會分人捉到。」
　中國天狗應了後，該兜童子講：
「無麼个大罪原諒佢好了，放佢走。」
　大家用腳在老法師囊腰仔跺等過去。
　慈惠大僧正一群人，想去山頂个時節，日本天狗正在草竇肚爬出來。
　挲下腰，行去中國天狗脣頭。
「仰般形，這擺做得順利行敢那？」
　日本天狗詐毋知問：
　中國天狗目汁瀾泔，應講：
「毋好講該無字个，摎像活佛樣个高僧做為對手，哪有贏个道理，敢毋係？」
「合理，毋過你毋係像中國恁大个國家个天狗咩。
　另外，像日本恁仰个細國，佢个人民講个高僧、名僧，你心肝肚想作得教訓佢兜。
　．．．為這種事枉費心機，傷到腰骨，實在衰過。」

　日本天狗也認為當衰過，渡等中國天狗去北山該位个温泉，
　浸溫泉醫好斷忒个腰骨後送佢轉中國。

煞咧