福娘童話集 > 日本昔話 > １月



浮世繪肚走出來个細妹仔

・日本語　・中国語　・客家語

・日本語＆中国語　・日本語＆客家語

客家語 : 鄧文政(ten33 vun55 zhin11)

※本作品は、読者からの投稿作品です。　投稿希望は、メールをお送りください。→連絡先

投稿者　「琴菜 ASMR」　　琴菜 ASMR

　頭擺頭擺，有一隻所在，戴一個窮苦个老阿婆摎厥倈仔。
　這個倈仔非常倚恃厥慈祥个阿姆，逐日做事斯賺自家食个酒錢定定。
　該個老阿婆忽然間死忒。
　佢个倈仔因為平常逐項事就倚恃厥姆，自家毋會煮飯、洗衫褲、掃屋，麽个都不曉得。
　連想愛討個餔娘，因為窮苦無人敢嫁佢，
　倈仔一儕人逐日過着盡毋方便又弧栖个日仔。

　有一日，佢在做事个頭家丹墀坪肚拈著一幅畫，係裡肚有一個盡靚个細妹仔个浮世繪。
　這種浮世繪當時盡受歡迎，色目又艶个畫。
　一儕人過日仔過著盡弧栖个倈仔摎該浮世繪拈轉去掛在壁頂，
　像生个人樣，摎佢講話，摎該日發生个事情講分佢聽。

　經過一站仔，有一日，
　倈仔事做忒轉屋下，平常屙屙遭遭，今晡日掃到淨淨俐俐，
　毋單淨恁樣，火缽肚火也點著、還有燒燒个一餐飯也煮好咧。
「還奇怪？會係麽儕做个？」
　該倈仔緊想緊食飯，摎平常共樣緊摎壁頂个畫講話。
「你啊，哪量時看到就係恁靚哪！
　今晡日毋知係麽人做个，屋下掃恁淨俐還又連好食个夜都煮好。
　在恁淨俐个屋肚食好食个夜，就像形係兩公婆樣。
　逐日恁仰無知有幾好。」
　
　細倈仔講忒就感覺當滿足个去睡目。
　該日以後第二日，在過第二日，當奇怪在佢做事做忒轉到屋下時節，
　屋下掃淨淨、飯煮好好。
（這到底係麼个事情？敢係莊內哪個細妹仔來做个？）

　第二日，該倈仔毋放心詐意出門做事，黏時翻轉頭轉屋囥到二樓。
　到臨晝仔，發現屋下幾時有一個當靚个細妹仔在該，一片掃屋一片在火缽肚个鑊仔煮滾水。
　該個倈仔著下驚，無想著會在樓頂出聲，講：
「噯，你係那位來个？麽儕？」
「哇！」
　分該忽然間傳來个聲音嚇著个細妹仔，脚嗄打盪溜，歸個人橫在煮等滾水个火缽。
「啊！危險！」
　該細倈仔慌慌張張在二樓像飛樣走下來，心肝肚想細妹仔會分火缽肚个火熝著無？無一下仔就毋見忒咧。
「仰會恁樣呢？該個細妹仔像形在哪位看過。」
　細賴仔頭那側等看該壁頂掛个浮世繪个時節，頂背細妹仔个位所變到白白。
「這係！．．．係無、係恁樣無？」
　畫在浮世繪頂个細妹仔，想著無討餔娘个細倈仔當衰過正會在畫肚走出來。
　從該量時開始，一年等過一年，該個細倈仔等浮世繪个細妹仔再過出現，毋過浮世繪个細妹仔無再過出現，浮世繪還係一直白白空等在該。

煞咧